Om Titanic på ulike måtar – skipshistorie som stadig fengjer.

I år er det som kjent 100 år sidan Titanic gjekk ned. Det var värdens modernaste osänkbara skep, som Mikael Wiehe skriv i visa Titanic (andraklasspassagerarens sista sång), og sjølv om vi veit korleis det endar sluttar visst historia om Titanic aldri å fascinere.  I samband med 100årsmarkeringa blømer interessa som aldri før, og det kjem nye artiklar, nye bøker og nye TV-program. I vekeavisa Dag og tid (nr. 13/14-i år)har forfattaren Oddmund Hagen skrive ein interessant artikkel om emnet. Han skriv m.a om boka Futility av den amerikanske forfattaren Morgan Robertson. Boka kom ut i 1898, og i romanen skriv forfattaren om skipet Titan som legg ut på ei reise over Atlanteren, går på eit isfjell og forliser sjølv om skipet var sagt å ikkje kunne søkkje. Og ikkje bare det, det er fleire detaljar i romanen som stemmer forunderleg bra med kva som verkeleg skjedde med den ekte Titanic fleire år etter.

Og kva med at skipsorkesteret, etter som ryktet går, spela salmen Næmere deg, min Gud? Men var det verkeleg slik? Det får du vite om du les Walter Lord si bok Titanic : verdens største skipskatastrofe. Den kom fyrste gong ut på norsk i 1956, og den norske utgåva har eit tillegg av Jostein Nyhamar der han skriv om nordmenn om bord på Titanic. Boka er også filma i 1958 med same namn som originaltittelen på boka A night to remember.

Det finst altså mykje stoff om Titanic, i ulike former og i ulike medium. Av dette er også noko retta mot barn, t.d. Titanic : det store forliset av Philip Wilkinson som kom ut på Esstess-Forlaget i 2011. Boka er rikt illustrert og med ein luftig layout som gjer den enkel å lese for dei som ikkje orkar så store mengder tekst.

Og det meste finn du sjølvsagt på biblioteket!

Britt i Seljord

Familien Kråkestup og nyset i nabohuset

Kari Smeland på gamle tomter. Her vitjar ho Kviteseid folkebibliotek.

 

Møt Kari Smeland frå Kviteseid som er ein av tre barnebokdebutantar på Samlaget denne våren. Ho er 27 år og  har ein bachelorgrad i historie- og samfunnvitskap. Ho bur i Oslo og  jobbar som for tida som skulebibliotekar.

Forfattaren lar oss bli kjend med ein stor og  frodig familie på ni personar; 3 tvillingpar, mor og far og onkel Sigurd. Han har levd lenge, og kan og veit mykje. Der dei bur har dei eit nabohus, men ingen naboar. Nabohuset er lite og falleferdig, og fråflytta for lenge sidan. Tittelen Familien Kråkestup og nyset i nabohuset tyder på at her kan skje både skumle og mystiske ting.
Pappa i familien er nemleg meir enn måteleg interessert i fuglar. Han er ven med dei, og let dei fly ut og inn av huset dei bur i. Kjenner ein noko til kråker så må ein førebu seg  på at ting kan skje. Skal ein tru mytologi og folketru så  er dei både glupe og utspekulerte.

Dei minste tvillingane, Stjerne og Lykke, er veldig nysgjerrige på å utforske skumle saker. Dei trur ikkje at nabohuset kan vere tomt. Dei synes dei høyrer lydar, og det hender uforklarlege ting. Ting tyder på at nokon har flytta inn!

Stjerne og Lykke er på veg bort til hekken der dei likar å snike.

Forlaget melder:
Kari Smeland har skapt eit eventyrleg univers, der ”Alt som kan skje når fiskesuppa koker over, skjer”, som det heiter i ei av dei fantasifulle kapitteloverskriftane. Utforskinga av nabohuset bind saman eit vell av absurde hendingar og boka er med sine frodige påfunn og formuleringar ein fryd å lese høgt”. Boka egner seg som høgtlesingsbok frå 5-6 år.  Godt skriftbilde og illustrasjonar gjer ho lett å lese også for barna sjølv frå 7-10 år. Boka er illustrert av Mona Brekke.

Boka er å finne både i bokhandelen og på bibliotekhyllene. Kari vil vitje Brunkeberg oppvekstsenter, Straumsnes oppvekstsenter og Kviteseid skule og fortelle om boka si.

Anne Brit Borgen
Kviteseid folkebibliotek

.

"Kom mai du skjønne milde,

     gjør skogen atter grønn……"

Når skogen blir grøn, fiolane blømer ved bekk og kilde, er det ei flott tid for alle som skal pynte festbord.

Og festbord kan det fort bli fleire av i mai. Mai er i det heile ei festleg tid.

Skulle du trenge litt inspirasjon, finst det mange bøker om borddekking, laging av kort og alt ein kan trenge til selskapet på biblioteket.

Det er også gjeve ut ei bok som set bordet og pynten i perspektiv.

I serien "Levende norske tradisjoner" har Eva Valebrokk skrive boka "Norske bordskikker – dekkede bord gjennom 500 år".

Denne boka er ei spanande kjelde til kunnskap. Her er merkverdige skikkar, pussige sitat og flotte bilete.

Les du litt, kan du skape ditt heilt personlege bord.
Om du til dømes puttar igler inn i tome eggeskal, vil egga rulle morosamt over bordet. Eller? Dei syntes i alle fall det var morosamt i barokken.
Det var  reine underhaldninga å knuse glasa ein drakk av. Så moro var det å knuse drikkeglas, at det i løpet av fire år blei levert 70 931 glas til det danske slottet.

Under barokken blei det elles slutt på å spytte over bordet eller snyte seg i bordduken. Greitt å vite om du inviterer gjester på barokt vis.

Du finn også meny-forslag og oppskrifter frå dei ulike epokane i denne boka.

Det er bare å setje i gang!

Skulle du ynskje litt meir inspirasjon når det kjem til blomster, kan den særs frodige boka til Isabella Smith: Blomster og buketter (Cappelen Damm i samarbeid med Det Norske Hageselskap, 2010) vere eit godt val.

Her er tips til bruk av blomar sommaren gjennom. Du får gode råd til alt frå dyrking til plukking og oppsett.

Det er fargelære og komposisjon av bukettar, kransar og kuler.

                                                   (Bilete lånt frå boka)


"Blomster og buketter" er ei riktig energibombe av ei bok.
Nett som ein slik dag i mai der du kan sjå blomane opne seg og trea grønast over dagen.

Lukke til med vår, sommar og fest!

Arbeidsveke på Tokke Bibliotek

Hei! Eg er ei 14 år gamal jente som går i 9.klasse på Edland Skule. Eg har vore på arbeidsveke på Tokke Bibliotek, der eg har fått prøva meg som bibliotekar. Det har vore ei artig og interessant veke, men det har også vore litt stressande og nervepirrande. Eg har fått god innsikt i kva vil seie å vere bibliotekar, som verkar som eit veldig morosamt yrke. Eg har jobba mykje med sortering, katologisering og registrering av bøkar, noko som var veldig artig! Eg har også blitt kjend med ein flott gjeng, noko som eg sett veldig pris på. 
Eg har også laga ei utstilling for ungdom, der eg har prøva å finne bøkar som dei forhåpentlegvis vil like. Her er eit bilete av utstillinga:

 De må kome til biblioteket for å sjå på bøkene eg har stilt ut!

-          Andrea Nordgarden

OBS! Opningstidene i mai!

Alle biblioteka i Vest-Telemark går snart over til nytt biblioteksystem. I samband med omlegginga vil dei fleste bibliotekavdelingane ha redusert tilbod/stenge, bare Fyresdal har ope som vanleg.

Her er det som gjeld:
 

         Nissedal: Stengt onsdag 16. mai

         Kviteseid, Seljord, Tokke og Vinje ( inkl. filialar): Stengt i perioden 14. -21. mai.

         Fyresdal: Ope som vanleg.

Har du akutt behov for bibliotekhjelp kan du ringe ordinært telefonnr. til ditt bibliotek. Vi hjelper sjølvsagt med det vi kan.

Frå og med tysdag 22. mai har alle avdelingar ordinære opningstider att, da med nytt biblioteksystem. Velkomne tilbake!

TA STØVLAN PÅ

Kjell Oskar Selman til minne - 1.mai 2012

Visediktaren, visesongaren, lyrikaren, journalisten, religionshistorikaren, redaktøren, talaren og vennen, Kjell Oskar Selman døydde brått påskeeftan 2012. Med ham har ein raus, kunnskapsrik og ikkje minst fargerik telemarking gått bort.

Kjell Oskar har budd så mange år i Seljord at vi nesten oppfatta ham som Seljording. Han deltok aktivt i den lokale Amnesty-gruppa, i viselaget, i kunstforeninga og i mållaget. Han skreiv ei rad dikt og viser og sette melodi til, både eigne og andre sine tekstar.

Kjell Oskar vart fødd i industristaden Sauda i 1942, og kjende godt til arbeidarmiljøet både der og andre stader.  Han skreiv visa: Ta støvlan på på 70-talet som eit bidrag til ein konkurranse om beste arbeidarsong. Visa har sidan vore fast innslag under 1.mai feiringa i Seljord og andre stader i Vest-Telemark, og vil nok ikkje bli gløymt.

TA STØVLAN PÅ

Ta støvlan på. Nå er dei tømd
for støv og stein, for støv og stein.
Me har fått kvile såre bein.
Ta støvlan på. Ta støvlan på.
Kan du høyre arbeidsropet.
Kan du høyre slegga slå.
Ja, kan du høyre slegga slå.
Ta arbeidstøvlan på.


Ta jakka på, me fekk ei stund
med sol på kinn, med sol på kinn.
Men enno blæs den kalde vind.
Ta jakka på. Ta jakka på.
Me har sett svarte natta før.
Den ljose morgon skal me sjå.
Den ljose morgon skal me sjå.
Ta arbeidsjakka på.


Ta songen fram med trommeslag
og flytespel, og fløytespel.
Vår song kan ingen slå hel.
Ta songen fram. Ta songen fram.
Så lenge der er tonar til
me syng frå hjartet utan skam.
Me syng frå hjartet utan skam.
Ta arbeidssongen fram.


Ta hatten av. Nei, aldri meir
me fell på kne, me fell på kne.
Og aldri slår me blikket ned.
Ta hatten av. Ta hatten av.
For alle bøygde arbeidsryggar
som gjekk rake i si grav.
Ja, som gjekk rake i si grav.
Ta arbeidshatten av.


Ta støvlan på. Nå er dei tømd
for støv og stein, for støv og stein.
Me har fått kvile såre bein.
Ta støvlan på. Ta støvlan på.
Dei tonge vegar har me vandra.
Vide vegar skal me gå.
Ja, vide vegar skal me gå.
Ta arbeidstøvlan på.

Takk til Else Selman som har gjeve oss lov til å nytte teksten i bloggen til Vest-Telemarkbiblioteka.

Anne Brit Borgen
Kviteseid folkebibliotek

VERDENS BOKDAG - VERD Å FEIRE!

 Vest-Telemarkbiblioteka er med på feiringa -
23.april – Verdens bokdag

Denne dagen baserar seg på ein tradisjon frå Barcelona, men vart ein internasjonal dag gjennom vedtak i generalforsamlinga til UNESCO (FNs organisasjon for utdanning, kultur og kommunikasjon) i 1995.

Målet med dagen er å markere boka si rolle i samfunnet, boka som uttrykksform, for språkleg- og kulturelt mangfald, for utdanning og for kommunikasjon.

Litteraturen er staden for kulturmøter, kjærleik, hat og svik. Bøker har ei eiga kraft som gjer at ytringsfridomen vert krenka kvar dag i mange land. I vårt land er ytringsfridomen sentral og biblioteka er viktige samfunnsaktørar.

Bokhandlarar, bibliotek, skular og flag over heile landet markerar Verdens Bokdag kvart år den 23. april.

Vest-Telemarkbiblioteka hadde to heile sider i Vest-Telemark blad laurdag 21.04 med boktips og bokmeldingar.  Nokre av desse artiklane vil bli publisert her på bloggen etter kvart. Vi nyttar høvet til å gratulere Kari Smeland frå Kviteseid. Hennar nynorske barnebok: Familien Kråkestup og nyset frå nabohuset vert lansert idag - på verdas bokdag.


Anne Brit Borgen
Kviteseid folkebibliotek